Un Facebook cargadiño de novidades: #hashtag, imaxes nos comentarios e novas estatísticas

O Facebook está a pórse guapo. Para que non falen del pola venda de información dos seus usuarios ao goberno USA? Pode que si, pode que non. Como esa misteriosa conferencia de prensa que terán hoxe para anunciar algo novo… Coincidencias… Mais na última semana presentaron dúas novas funcionalidades, os #hashtag e as posibilidade de engadir comentarios nas imaxes, e tamén un redeseño das estatísticas para páxinas. Vaiamos por partes.

#Hashtag

Agora a xente xa non pon etiquetas aos máis. Agora o cool e utilizar #hashtag. A moda chegou ao Facebook importada de Twitter (e doutras redes sociais). Para usalos, só tes que engadir o simboliño “#” á palabra que queres marcar das túas publicacións. Esta palabra poderase premer para que poidas botar un ollo sobre o que comparte a xente con ese tema, tal e como se fai no Twitter.

Problemas que lle vexo:

• Non atopas por ningures nin os hashtag que empregas nin unha forma de buscar por hashtag. Para facer isto último tes que escribir na barra de enderezos do navedador o seguinte. http://www.facebook.com/hashtag/ohashtagquequeiras
• Ollo ao piollo: se estás preocupado pola privacidade, lembra marcares a mellor opción cando publiques unha actualización con #hashtag. Se o fixeres público, será visible por calquera persoa que procura por un hashtag.

Unha publicación de estado que só será visíbel para as miñas amizades

Responder a un comentario cunha imaxe

Disque a partir de agora atoparemos unha icona de “cámara de fótos” á dereita da caixa para meter comentarios. Disque, porque eu non a atopo. Disque se a prememos, poderemos subir unha imaxe como comentario.

Disque esta funcionalidade está activa desde onte. Disque vai introducíndose pouco a pouco. Disque se algunha amizade xa a ten, poderás comentar cunha foto… Vale, ben.

Novo deseño das estatísticas para as páxinas

Outro deses disque-disque é un novo deseño para as estatísticas das páxinas, como anunciaron os de Facebook. A cousa quedaría tal que así:

Captura do que será o novo deseño para as estatísticas das páxinas

O obxectivo deste cambio é facer as estatísticas máis clariñas e simples. Agardaremos por elas para ver se é así, porque as actuais precisan un mestrado para seren comprendidas fóra das cousas máis básicas…

E agora, especulemos co que presentan hoxe… Un lector RSS? Vídeo para Instagram? Unha forma máis eficaz de mangarche os datos, vendelos e que non te enteres nunca?

Advertisements

Xa podes activar o Twitter Analytics

Un compi de traballo avísame vía correo electrónico que xa está dispoñíbel para case todas as contas Twitter Analytics, a ferramenta oficial da compañía do paxariño para estares ao tanto sobre as estatísticas máis básicas do teu perfil.

Aquí tes os pasos necesarios e de que vai Twitter Analytics.

Paso 1: darse de alta

O primeiro que tes que facer é darte de alta en https://analytics.twitter.com/login como é mester nestes casos: nome de usuario e contrasinal, sempre que os lembrares.

Paso 2: Account ineligible

Logo de te logueares, aparecerá unha pantalla ruín e falsa que te pode levar ao equívoco. Cando menos a min. Un simpático aviso do sistema dirache que tes unha “Account ineligible”. Teus mortos!, por se acaso.

Este aviso en vermello refírese aos Twitter Ads que non sei o porqué de que apareza aquí. Non lle fagas caso. Arriba aparecerá un menú “Analytics” que por agora trae dúas opcións: Timeline activity e Followers.

Menú do Twitter Analytics

O de por agora dígoo ben. Algúns usuarios atoparon un terceiro menú: Sitios web. Eu busco, rebusco e actualizo o trebello de forma compulsiva cada 5 minutos… E nada, que non aparece.

Paso 3: Timeline activity

Iso de “Timeline activity que nos aparece aos que chiamos co Twitter en galego vén a ser o lugar en que se compila todo o relacionado coa nosa conta de Twitter: mencións, estatísticas de novos seguidores, análise de cada tuit que inclúe as veces que foron retuiteados, marcados como favoritos ou as respostas recibidas.

Non vos poño unha captura de pantalla para non quedar en evidencia das miñas cativas estatísticas.

Paso 4: Followers

Gustaríame dicirvos de que vai esta opción mais isto é o que me aparece:

Opción Followers

Segundo a fonte anterior, disque neste separador aparece toda a información referida ás persoas que teñen a ben seguirte: ritmo de crecemento, intereses, localización, sexo…

Conclusión

Se es un/unha “simpatizante” ou “militante de base” na rede social dos “paxariños por aquí, paxariños por alá”, o Twitter Analytics pode ter a utilidade de procrastinar cada certo tempo e ver como che vai o conto sen máis importancia ca esa.

Agora ben, se es un/unha “cargo electo” ou te dedicas profesionalmente a isto das redes sociais, o Twitter Analytics é unha opción rápida e sinxela de obteres os primeiros e máis básicos datos sobre aquelas contas que xestionas.

Que nervios! O Gmail renóvase!

Acaban de anuncialo no seu blog e non podo aturar a espera: Gmail renóvase! Chachipiruli!

E por que esta renovación? Será que, xa que se puxeron co Google+, pois oes, por que non? Ou será que, xa que está a punto de “cascar” Google Reader mellor dar un motivo para non falar do tema?

Ains, mal pensados… A explicación que dan comeza coa evidencia. Temos millenta correos: as pesadas notificacións sociais, as máis pesadas ofertas e ofertas desa empresa da que nin lembras cando lle deches ao botón de “Recibir novidades por correo”, que non sabes como desactivar e que teima en saír da caixa do corro lixo; e, entre eses 30 correos, un importante que talvez pode pasar desapercibido.

Gmail non quere que procrastines e agora ofrecerache unha nova caixa de entrada moito máis organizadiña. Mediante lapelas, o correo separarase en ata cinco bandexas diferentes: principal, social, promocións, notificacións e foros. As súas opcións, prometen, serán facilmente personalizables.

Digo prometen porque, a pesar de que nalgúns sitios falan que esa actualización estará dispoñíbel urbi et orbi a partir das 18:00 h (horario galego), eu aínda nin a cheirei. E vós?

Por certo, amigos de Gmail/Google: xa que lle dades á renovación e tal, por que non lle dades ao botonciño de validar a tradución da interface en galego? Que leva 8 anos feita, ho!

O novo Google+ mola mil mais…

Un día dixen que non volvería entrar en Google+ até que tivese versión en galego. Ese día chegou hai máis dun ano e entrei… mais volvín saír. Cada certo tempo, ábroo e pregunto se hai alguén aí e semella que hai. Mais nada, ché, que non me engancho.

Até que o outro día fixen un hangout por motivos laborais e zas! aí estaba o Google+ noviño do trinque.

Si, agora Google+ mola mil, moi cómodo, moi visual, moi Pinterest, mellora na subida das imaxes e 15 GB para almacenalas, adopcións dos hasgtags, mensaxería multiplataforma e con capacidade de subir multimedia…

Mais segue faltando algo: xente. Como Google non pode pór unha pistola na cabeza a todo o mundo para que se rexistre en Google+, a compañía tira de pinchacarneiro tecnolóxico para sumar persoas ao seu carro: algúns dos seus servizos “extra” obrigan xa a estar dado de alta como usuario de Google+ para poder gozar deles.

Mais Google volve equivocarse outra vez: dar, darase de alta, porén o importante dunha rede social é que a xente interactúe nela, que procrastine no traballo no canto de facer ese Excel tan superurxente ou na casa no lugar de pasar o ferro. E iso non acontece: mentres en Facebook o usuario medio gasta 6 horas e 44 minutos a darlle ao “Gústame” a destro e sinistro ou subir fotos con beizos de parrulo, en Google+ menos de 7 minutos…

Google+ mola mil, si, mais a sensación que un ten ao entrar é esta. Seguirá así?

Presentado oficialmente Twitter #Music

Captura de https://music.twitter.com/

O blog de Twitter vén de anunciar algo do que se estivo falando nas últimas semanas: o novo servizo Twitter Music, un proxecto que servirá para que os e as amantes da música gocen dela a través da rede social.

Como xa é costume en todo servizo novidoso, irase abrindo de forma gradual por países e usuarios, comezando polos EE.UU., Reino Unido, Irlanda, Australia. Pola periferia 2.0 teremos que agardar a que teñan a ben abrilo.

E tamén, como xa é costume, os de Twitter tampouco teñen avoa. Lede, senón, como se presentan:

Hoxe lanzamos Twitter Music, un novo servizo que vai mudar a forma en que a xente atopa música. Utiliza a actividade de Twitter, incluíndo os chíos e o “engagement” para detectar e aflorar os temas máis populares e os artistas emerxentes

Basicamente o que fai este servizo é recoller a música que se chía a partir de tres fontes: iTunes, Spotify e Rdio. A partir dela, poderás acceder ao perfil dun artista para escoitar as súas cancións, ver a súa conta de Twitter, ler as súas novidades, descubrir novos temas e artistas e compartilo cos teus seguidores. O pack inclúe app para iPhone e Android que tampouco a temos dispoñíbeis…

Do seu funcionamento falaremos cando poidamos acceder e agardemos que sexa máis refinado que eses artistas que Spotify che recomenda e que en nada se asemellan ao cento de horas de música que escoitaches na aplicación ¬¬

Google pensa na túa morte

Captura da páxina do administrador de contas inactivas de Google

Nunca pensaches que lle pasará ás túas fotos, correos electrónicos e documentos cando non poidas usar a túa conta “por calquera motivo”? En definitiva, cando a palmes?

Google, que o sabe todo, que está en todo e en todas as partes, pensou por ti para tomar decisións neses momentos delicados. Vén de presentar unha nova función que che permitirá decidir que desexas facer con todas as túas contas unha vez que pases á realidade 0.0, o alén.

O invento recibe o nome sutil e eufemístico de “Administrador de contas inactivas” que xa a tes dispoñíbel para configurares ao teu gusto. Así poderás quer elixir destruír os teus datos logo de 3, 6 ou 12 meses de inactividade ou quer seleccionar até 10 contactos de confianza para que reciban os teus datos e poidan investigar que foi o que fixeches na túa vida virtual.

Iso si, para evitar a eliminación da conta “sen querer”, podes estabelecer un correo electrónico ou un teléfono ao que se che enviará unha mensaxe para que confirmes que estás vivo. Se confirmares o contrario, mal andamos 🙂

 

Ligazón: Administrador de contas inactivas

#informetwitter: chaves para comunicar en Twitter

Unha das imaxes da presentación #informetwitter

En que se fixa un tuiteiro cando entra na rede social? Que tipo de temas e de chíos son os que enganchan? Cal é a mellor hora para chiar? Cales son as chaves para comunicar eficazmente en Twitter? Estas e outras preguntas teñen resposta e están no #informetwitter que se vén de presentar.

O #informetwitter xurdiu na necesidade de coñecer o comportamento das persoas usuarias cando pasan o seu tempo en Twitter. Está elaborado por Redbility, Influenzia e o Máster de Periodismo Dixital e Redes Sociais da UEM.

O proceso de investigación para realizar o informe foi novidoso: gravouse o comportamento de de 38 persoas con certa influencia nas redes sociais ao tempo que se recollían datos a través de técnicas de observación directa. Foron colocados biosensores, estimuladores de enerxía emocional e empregouse a técnica do rastrexadores de ollo (eyetracking) para saber o que se estaba vendo en cada momento.

O resultado de todo este proceso é o #informetwitter que se presenta neste vídeo e que se pode descargar nesta ligazón, onde tamén atoparás material complementario:

Cómpre telo a man e lelo con calma, non si?

Pagarías por enviarlle un correo a alguén en Facebook?

Messenger, o aplicativo de Facebook para chatear e enviar mensaxes

Segundo comenta The Telegraph, Facebook está probando un novo sistema para que poidas enviarlles mensaxes a persoas con que non estás conectado. Iso si, sempre pasando por caixa.

A tarifa non sería plana: o custo da mensaxe, segundo explica The Telegraph, variaría en función do número de amizades que ten a persoa e tamén do número de persoas que queren contactar con ela. Se queres enviarlle unha mensaxe a un famoso, podería saírche por unhas 10 libras de nada. Se se tratar dun “anónimo”, o custo sería inferior mais, de todas as formas, sería custo.

Os de Facebook Inc comentan que este sistema de pagamento está ideado para evitar o correo-lixo e na actualidade andan a probar diferentes taxas para estabeleceren un prezo axeitado. Agora ben, eu vexo tamén outra finalidade: cash.

Estarías disposto a pagar por enviarlle unha mensaxe a alguén que non coñeces?

Facebook Home: todo quedou nun lanzador para Android…

Captura de pantalla do web promocional de Facebook Home

Hai uns días, Facebook Inc. convocaba á prensa para unha desas presentacións multitudinarias a cargo do seu imberbe CEO, Mark Zuckerberg. Como sempre que hai un destes e-ventos, comezaron as especulacións máis ou menos acertadas: que se presentaría o seu propio teléfono, que se presentaría o seu propio sistema operativo, ou que se presentaría un Android “tuneado”.

Mais o que se prevía un bombazo informativo ficou nun petardiño: Facebook Home (pronunciado /həʊm/) un aplicativo para Android que funcionará de lanzador para o móbil e que se poderá instalar a partir do día 12 de abril. Como propina, anunciaron o HTC First, o primeiro smarthphone co “invento” instalado e que se pode mercar a un prezo máis que competitivo: 99,99 $.

Que é (e que creo que será) Facebook Home

Segundo explican, Facebook Home é un aplicativo “para dar prioridade ás túas amizades no móbil” a través de introducir as actualizacións da rede social no fondo de pantalla. Deste xeito, verás o que lle pasa aos teus contactos en Facebook sen a necesidade de abrir ningún aplicativo. Ademais, compleméntase con funcionalidades para facer máis vistosas as mensaxes e outras notificacións.

Mais o aplicativo ten truco, como ben explican en Genbeta.com.E é que Facebook non dá puntada sen fío: haberá anuncios neste lanzador. Por tanto, a prioridade non é tanto as túas amizades, son os cartos, diñeiro, facer máis “cash” cun novo produto de mercadotecnia para que as empresas se metan no teu peto.

Como sempre, aínda non explicaron (nin explicarán, acho) como funcionarán nin de que tipo serán os anuncios no Facebook Home. Mais a pregunta é evidente: estás disposto a que o primeiro que vexas na pantalla do teu móbil sexa un anuncio?

#FoodShareFilter: o filtro solidario de Manos Unidas para Instagram

Captura do web da campaña FoodShareFilter

Para quen non a coñeza, un resumo rápido: Instagram é unha app-rede-social-todo-xunto que lle permite aos usuarios tirar unha fotografía, aplicarlle un filtro dixital e despois compartir a imaxe en varias redes sociais dun xeito rápido, doado e intuitivo. O soño de todo hipster feito realidade: parecer (que non ser) un fotógrafo profesional.

Na práctica, para moitos Instagram acabou por se converter nun menú virtual onde publicar fotos e máis fotos de pratos deliciosos. E aí é onde entraron os de Manos Unidas: o que é xa un xesto habitual nesta rede social converterase en axuda solidaria a través do filtro #FoodShareFilter.

Como ben explican no web da campaña, #FoodShareFilter é o primeiro filtro solidario de Instagram que che permitirá compartir a túa comida, pero compartila de verdade, porque o diñeiro recadado coa descarga irá destinado para os programas de axuda contra a fame de Manos Unidas”.

O custo do filtro é de 0,89€ e está dispoñíbel na Apple Store para maqueiros e no Google Play para os androides.